غزہ پر عرب حکمرانوں کا کردار شرمناک اور نیتن یاہو پوری دنیا کے امن کی تباہی کا مجرم ہے، لیاقت بلوچ

مہر خبررساں ایجنسی کے مطابق، نائب امیر جماعت اسلامی پاکستان لیاقت بلوچ نے کہا ہے کہ بیت المقدس اور غزہ کی صورتحال پر عالمِ اسلام کی دانستہ خاموشی المیہ ہے۔ انہوں نے کہا کہ غزہ خوفناک خونریزی کا شکار ہے، اقوام متحدہ سمیت عالمی ادارے بے بسی اور بے حسی کا شکار ہیں۔ لیاقت بلوچ نے کہا کہ جماعت اسلامی فلسطینیوں سے یکجہتی کیلئے ملک گیر جدوجہد کرے گی، قابض اسرائیلی وزیراعظم نیتن یاہو پوری دنیا کے امن کی تباہی کا مجرم ہے۔ انہوں نے کہا کہ امت مسلمہ کا کردار اتنہائی افسوسناک ہے جبکہ غزہ کے مظلوم مسلمان امت سے مایوس ہو کر اللہ کی طرف دیکھ رہے ہیں، جو  بہت ہی المناک ہے۔

لیاقت بلوچ کا کہنا تھا کہ مظلوم کی آہ عرش ہلا دیتی ہے، اللہ کو ہماری بے حسی پر جلال آ گیا تو پھر ہم بھی نہیں بچیں گے۔ انہوں نے حکومت پاکستان سے مطالبہ کیا ہے کہ اقوام متحدہ سمیت عالمی اداروں میں غزہ کے مظلوموں کیلئے آواز اٹھائیں اور امت کو ایک پیج پر لاکر او آئی سی اس حوالے سے لائحہ عمل دے۔ لیاقت بلوچ کا کہنا ہے کہ عرب حکمرانوں کا کردار شرمناک ہے، کہ وہ مظلوموں کی مدد کی بجائے ظالموں کی صفوں میں کھڑے ہیں۔