امریکی اور صہیونی منصوبہ بری طرح ناکام، عوام اور پاسداران نے ملکر ملک کا دفاع کیا، امام جمعہ تہران

مہر خبررساں ایجنسی کی رپورٹ کے مطابق، تہران کے قائم مقام خطیب جمعہ نے کہا ہے کہ سپاہ پاسداران انقلاب اسلامی (آئی آر جی سی) کے جوان ملک کے باوقار عوام اور اسلامی انقلاب کے تحفظ کا بنیادی ستون ہیں۔

تہران میں مصلائے امام خمینی (رح) میں اس ہفتے نماز جمعہ کے خطبے سے خطاب کرتے ہوئے حجۃ الاسلام محمد جواد حاج علی اکبری نے امام حسینؑ کی ولادت کی مناسبت اور قومی یوم پاسداران انقلاب پر مبارکباد پیش کی۔ انہوں نے اس موقع پر زور دیا کہ آئی آر جی سی بیرونی خطرات کے مقابلے میں عوام اور اسلامی انقلاب کے دفاع کی اصل طاقت ہے۔

انہوں نے ملک میں پاسداران انقلاب کے نمایاں مقام کا حوالہ دیتے ہوئے کہا کہ یہ فورس عوام کے تحفظ اور اسلامی انقلاب کی مقدس اقدار کے دفاع میں کلیدی کردار ادا کر رہی ہے، اور امید ظاہر کی کہ آئی آر جی سی آئندہ بھی ملک میں اپنا مؤثر کردار جاری رکھے گی۔

امام جمعہ نے ان سینئر ایرانی کمانڈروں کے نام اور یادیں بھی تازہ کیں جنہوں نے ایران کا نام دنیا بھر میں بلند کرنے کے لیے اپنی تمام تر صلاحیتیں صرف کیں اور جام شہادت نوش کیا۔

خطاب کے ایک اور حصے میں انہوں نے ملک کے مختلف شہروں اور صوبوں میں پیش آنے والے حالیہ بیرونی حمایت یافتہ پرتشدد فسادات کا ذکر کیا اور کہا کہ رہبر انقلاب اسلامی آیت اللہ سید علی خامنہ ای کی دانشمندانہ قیادت میں ایرانی عوام نے دشمنوں، بالخصوص امریکا اور صہیونی نظام، کی سازشوں کو ناکام بنا دیا۔

انہوں نے کہا کہ ملک دشمنوں نے پرامن معاشی احتجاج کو ہائی جیک کر کے اسے پرتشدد فسادات میں بدلنے کی کوشش کی۔

ان کا مزید کہنا تھا کہ دشمن 12 روزہ جنگ میں ہونے والی اپنی شکست کا ازالہ کرنا چاہتے تھے اور اسی مقصد کے تحت ملک بھر میں بدامنی پھیلانے کی سازش کی گئی، تاہم ایرانی مسلح افواج اور باوقار عوام نے مل کر ان ناپاک عزائم کو خاک میں ملا دیا۔