مہر خبررساں ایجنسی، مانیٹرنگ ڈیسک: گزشتہ ہفتہ ایران کے لیے سیاسی، اقتصادی، ثقافتی اور سماجی لحاظ سے واقعات سے بھرپور رہا۔ یہ واقعات اگرچہ ملک کے مختلف گوشوں میں رونما ہوئے، لیکن مجموعی طور پر انہوں نے ایران کی داخلی صورتحال اور بین الاقوامی تعلقات کی ایک واضح تصویر پیش کی۔ اس ہفتہ وار رپورٹ میں اہم ترین واقعات کا خلاصہ پیش کیا جارہا ہے جو ایران کی پالیسی سازی، معیشت، ثقافت اور علاقائی حیثیت پر اثر انداز ہوئے۔
ایشین یوتھ گیمز: بحرین میں ایرانی کھلاڑیوں کی شاندار کارکردگی
ایران کے نوجوان کھلاڑیوں کے کاروان نے سفیران امید کے عنوان سے بحرین میں منعقدہ تیسرے ایشین یوتھ گیمز کے کھیلوں میں بھرپور شرکت کی۔ ایرانی ٹیم نے مجموعی طور پر 76 تمغے حاصل کیے، جن میں 22 طلائی، 18 چاندی اور 36 کانسی کے تمغے شامل ہیں۔ اس شاندار کارکردگی کے ساتھ ایران نے ایشیا میں چوتھی پوزیشن حاصل کی۔
یہ نتیجہ اس بات کا ثبوت ہے کہ ایرانی نوجوان کھلاڑیوں نے انفرادی اور ٹیم مقابلوں میں نمایاں ترقی کی ہے۔ یہ کامیابی ایران میں کھیلوں کی ترقی اور نوجوانوں کی تربیت کا مظہر ہے۔
تہران بین الاقوامی مختصر فلم فیسٹیول اختتام پذیر، بہترین فلموں کا اعلان
تہران میں 42ویں بین الاقوامی فلم فیسٹیول جمعہ کی شب ایران مال میں اختتام پذیر ہوا۔ اس موقع پر قومی اور بین الاقوامی سطح پر منتخب فلموں کے فاتحین کا اعلان کیا گیا۔ اختتامی تقریب میں نائب صدر برائے امورِ خواتین و خاندان زہرا بہروزآذر، سمیت ملک کے ممتاز فلم ساز اور سینما شخصیات نے شرکت کی۔
فیسٹیول میں پیش کی گئی فلموں نے نہ صرف فنی معیار بلکہ سماجی اور ثقافتی موضوعات پر بھی گہرا اثر چھوڑا، اور نوجوان فلم سازوں کی تخلیقی صلاحیتوں کو اجاگر کیا۔
ایران، افغانستان اور ترکی کے ساتھ ریلوے تعاون میں شامل
ایران نے افغانستان اور ترکی کے ساتھ ایک سہ فریقی ریلوے تعاون کے معاہدے پر دستخط کیے ہیں، جس کا مقصد خطے میں مال برداری اور تجارتی ترسیل کو فروغ دینا ہے۔ اس معاہدے کے تحت ایران، خواف–ہرات ریلوے لائن کی توسیع اور اسے مزار شریف تک لے جانے کے لیے فنی، مالی اور انسانی وسائل فراہم کرے گا۔
یہ معاہدہ نہ صرف سامان کی ترسیل کو آسان بنائے گا بلکہ ریلوے نظام کی استعداد میں بھی اضافہ کرے گا۔ اس کے ذریعے تینوں ممالک کے درمیان فنی تعاون کو فروغ ملے گا اور ایران کو خطے کے بنیادی ڈھانچے کے منصوبوں میں ایک فعال شراکت دار کے طور پر مستحکم کرے گا۔
ایران اور پاکستان کے درمیان سرحدی تجارت کو فروغ دینے کے لیے زمینی و ریلوے تعاون
ایران نے پاکستان کے ساتھ علاقائی تجارتی تعاون کو مضبوط بنانے کے لیے زمینی اور ریلوے ذرائع میں بہتری کے اقدامات کا اعلان کیا ہے۔ ایرانی وزیر سڑک و شہری ترقی فرزانہ صادق نے اپنے حالیہ دورۂ پاکستان کے بعد بتایا کہ دونوں ممالک نے کسٹم کے طریقۂ کار کو آسان بنانے اور ریلوے لائنوں کی تجدید پر اتفاق کیا ہے، جس سے تجارتی ٹرکوں کی آمد و رفت مزید سہل ہوجائے گی۔
انہوں نے کہا کہ ان اقدامات سے ایران اور پاکستان کے درمیان زمینی، ریلوے اور سمندری روابط کو مضبوط ہوں گے اور دونوں ممالک چین سے یورپ تک پھیلے تجارتی راہداریوں سے مؤثر طور پر منسلک ہوں گے۔
ایران 2025 میں شنگھائی تنظیم کی انسدادِ دہشتگردی مشقوں کی میزبانی کرے گا
ایران 2025 میں شنگھائی تعاون تنظیم کی مشترکہ انسدادِ دہشتگردی مشقوں کی میزبانی کرے گا، جو تہران کے علاقائی سلامتی میں بڑھتے ہوئے کردار اور کثیرالجہتی تعاون کی اہمیت کو اجاگر کرتی ہے۔ یہ مشق "سهند ضدتروریسم 2025" کے عنوان سے 4 دسمبر کو تبریز کے قریب منعقد کی جائے گی۔
اس مشق میں شنگھائی تنظیم کے تمام رکن ممالک کی انٹیلیجنس اور سیکیورٹی ایجنسیاں حصہ لیں گی۔ اس کا مقصد سرحد پار خطرات کے خلاف عملی تیاری کو مضبوط بنانا ہے۔ یہ تنظیم کی دوسری براہِ راست انسدادِ دہشتگردی مشق ہوگی، جس میں دہشتگردی، انتہا پسندی، علیحدگی پسندی اور جدید خطرات جیسے نارکوٹیرورزم اور منشیات کی اسمگلنگ پر خصوصی توجہ دی جائے گی۔
ایران اور روس کے تھنک ٹینکس کی نشست، فکری و حکمت عملی روابط کو فروغ دینے پر زور
ایران کی وزارت خارجہ کے سیاسی و بین الاقوامی مطالعاتی مرکز اور روس کے دولت مشترکہ ممالک کے انسٹیٹیوٹ کے درمیان ایک مشترکہ گول میز کانفرنس کا انعقاد ہوا، جس میں دونوں ممالک کے تھنک ٹینکس نے فکری و حکمت عملی روابط کو فروغ دینے کی ضرورت پر زور دیا۔
نشست کے آغاز میں ایرانی مرکز کے سربراہ سعید خطیبزاده اور روسی انسٹیٹوٹ کے سربراہ کنسانتین زاتولین نے ایران و روس کے درمیان جامع اسٹریٹجک تعاون کے معاہدے کے تناظر میں مختلف شعبوں میں تعاون کی نشاندہی کی۔ انہوں نے ماہرین کے درمیان گہرے مکالمے اور مشترکہ فہم کی بنیاد پر تعلقات کو مزید مستحکم کرنے کی ضرورت پر زور دیا۔
ایران نے اقوام متحدہ کی سائبر جرائم کے خلاف کنونشن پر دستخط کر دیے
ایران نے ویتنام کے دارالحکومت ہنوئی میں اقوام متحدہ کی سائبر جرائم کے خلاف کنونشن پر باضابطہ طور پر دستخط کر دیے۔ یہ اقدام عالمی سطح پر سائبر سیکیورٹی کے شعبے میں تعاون کے لیے ایران کی وابستگی کا مظہر ہے۔
اس موقع پر ایران کی نمائندگی وزارتِ خارجہ کے معاون وحید جلالزاده نے کی۔ انہوں نے ایران کے عالمی برادری میں ایک ذمہ دار رکن کے کردار پر زور دیتے ہوئے کہا کہ ایران نے گزشتہ چار سال کے دوران اس کنونشن کی تیاری میں فعال کردار ادا کیا ہے۔
ایران میں قومی مصنوعی ذہانت ادارے کے قیام کی منظوری
ایرانی پارلیمنٹ نے قومی ادارہ برائے مصنوعی ذہانت کے قیام کی منظوری دے دی ہے۔ یہ ادارہ خودمختار طور پر صدرِ مملکت کے زیرِ نگرانی کام کرے گا اور اس کی ذمہ داری ہوگی کہ وہ مختلف وزارتوں اور اداروں کے ساتھ مل کر قومی سطح پر مصنوعی ذہانت کی حکمت عملیوں کو نافذ کرے۔
اس ادارے کا سربراہ براہِ راست صدرِ مملکت کی جانب سے مقرر کیا جائے گا۔ قانون کے مطابق، ادارہ تین ماہ کے اندر اپنا آئین معاونتِ علمی، منصوبہ بندی و بجٹ تنظیم، اور وزارت ہائے سائنس، صحت، مواصلات، محنت اور تعلیم کے تعاون سے تیار کرکے منظوری کے لیے کابینہ کو پیش کرے گا۔
ایران اور افغانستان کے درمیان تجارتی و سرحدی تعاون پر اعلی سطحی مذاکرات
ایران کے نائب وزیر برائے قانونی و بین الاقوامی امور، کاظم غریبآبادی نے دورۂ ہرات کے دوران افغان حکام سے ملاقات میں ایران-افغانستان سرحدی تعاون کو فروغ دینے پر زور دیا۔ انہوں نے نوراحمد اسلامجار، گورنر ہرات سے ملاقات میں دونوں ممالک کے دیرینہ ہمسایہ، ثقافتی اور مذہبی تعلقات کا حوالہ دیتے ہوئے اقتصادی و تجارتی روابط کو مزید مستحکم کرنے کی ضرورت پر زور دیا۔
مذاکرات میں خواف–ہرات ریلوے منصوبے اور اس کی مزار شریف تک توسیع کی تجویز پر بھی غور کیا گیا۔ اس کے علاوہ، مشترکہ زرعی منصوبے، جیسے کہ افغانستان میں ایرانی معیار کے مطابق پانی طلب فصلوں کی کاشت، اور مشترکہ لائیو اسٹاک پروگرامز پر بھی تبادلہ خیال کیا گیا۔
تہران میں ایکو وزرائے داخلہ کا اجلاس، علاقائی سلامتی اور اقتصادی ترقی پر زور
اقتصادی تعاون تنظیم کے وزرائے اجلاس کا چوتھا دور تہران میں منعقد ہوا۔ صدر ایران مسعود پزشکیان نے اجلاس سے خطاب کرتے ہوئے خطے میں پائیدار اور مربوط سیکیورٹی فریم ورک کی تشکیل کی ضرورت پر زور دیا تاکہ علاقائی استحکام اور اقتصادی ترقی کو فروغ دیا جا سکے۔
ایرانی وزیرِ داخلہ، اسکندر مؤمنی نے دہشتگردی، منظم جرائم، سائبر جرائم اور غیرقانونی ہجرت جیسے چیلنجز سے نمٹنے کے لیے کثیرالجہتی تعاون کی ضرورت پر زور دیا۔ انہوں نے "ایکو اسمارٹ سٹیز" منصوبہ اور مشترکہ ویزا اسکیم کی تجویز دی تاکہ تجارت اور سرحد پار سفر کو آسان بنایا جا سکے۔
ایکو کے سیکرٹری جنرل، اسد مجید خان نے ایران کے فعال کردار کو سراہتے ہوئے کہا کہ تہران نے علاقائی تعاون اور مشترکہ سیکیورٹی اقدامات کے فروغ میں اہم کردار ادا کیا ہے۔
ایرانی ساختہ طیارے "سیمرغ" کی آزمائشی پروازیں شروع
ایران نے اپنی مقامی سطح پر تیار کردہ ٹرانسپورٹ طیارے "سیمرغ" کی آزمائشی پروازوں کا آغاز کردیا ہے، جو ملکی فضائی صنعت میں ایک اہم سنگ میل کی حیثیت رکھتا ہے۔ یہ طیارہ 6 ٹن وزن کو 3900 کلومیٹر تک لے جانے کی صلاحیت رکھتا ہے اور اس وقت 100 گھنٹے کی آزمائشی پروازوں کے مرحلے سے گزر رہا ہے۔
سیمرغ کی تیاری میں 15 سال کا عرصہ لگا، اور یہ دو 2500 ہارس پاور انجنوں سے لیس ہے، جب کہ اس کا زیادہ سے زیادہ ٹیک آف وزن 21.5 ٹن ہے۔
اس منصوبے کے ساتھ ایران دنیا کے ان 20 سے کم ممالک میں شامل ہوگیا ہے جو مکمل طیارہ سازی کی صلاحیت رکھتے ہیں۔
مریوان میں بین الاقوامی اسٹریٹ تھیٹر فیسٹیول اختتام پذیر
کردستان کے سرحدی شہر مریوان میں 18ویں بین الاقوامی اسٹریٹ تھیٹر فیسٹیول اختتام پذیر ہوگیا۔ اختتامی تقریب میں منتخب فنکاروں اور تخلیقی ٹیموں کو ان کی بہترین کارکردگی پر اعزازات سے نوازا گیا۔
فیسٹیول میں ایران سمیت کئی ممالک کے فنکاروں نے شرکت کی، جنہوں نے عوامی مقامات پر تھیٹر کے ذریعے سماجی، ثقافتی اور انسانی موضوعات کو اجاگر کیا۔ منتظمین کے مطابق، یہ فیسٹیول نہ صرف فنونِ لطیفہ کی ترویج کا ذریعہ ہے بلکہ بین الاقوامی ثقافتی روابط کو فروغ دینے کا ایک مؤثر پلیٹ فارم بھی ہے۔
آپ کا تبصرہ