پہلگام حملہ، دہشت گردوں کو تصور سے بھی بڑی سزا دی جائے گی، بھارتی وزیر اعظم

مہر خبررساں ایجنسی نے بھارتی میڈیا کے حوالے سے نقل کیا ہے کہ ہندوستانی وزیر اعظم نے پہلگام کی وادی بیسرن میں ہوئے اس حملے نے پورے ملک کو ہلا کر رکھ دیا ہے۔ ہم نے اپنے بیٹے، بھائی اور شریکِ حیات کھو دیے ہیں، کوئی بنگالی تھا، کوئی کنڑ بولتا تھا، کوئی مہاراشٹر کا تھا، کوئی اوڑیہ، کوئی گجراتی اور کوئی بہار کا سپوت تھا۔ آج کرگل سے کنیا کماری تک ہمارا غم اور غصہ ایک جیسا ہے۔

مودی نے کہا کہ یہ حملہ نہتے اور بے گناہ سیاحوں پر نہیں، بلکہ ہندوستان کی روح پر حملہ تھا۔ انہوں نے زور دے کر کہا، ’’میں بہت صاف الفاظ میں کہتا ہوں، جنہوں نے یہ حملہ کیا ہے، انہیں اور ان کے سرپرستوں کو ایسی سزا دی جائے گی جو انہوں نے سوچا بھی نہ ہوگا۔

انہوں نے کہا کہ 140 کروڑ ہندوستانیوں کی طاقت اب دہشت گردی کے سرپرستوں کی کمر توڑ دے گی۔ انہوں نے کہا کہ اب وہ وقت آ گیا ہے کہ دہشت گردی کے بچے کھچے اڈے بھی صفحۂ ہستی سے مٹا دیے جائیں۔ ہم زمین کے آخری سرے تک ان کا پیچھا کریں گے اور انہیں انصاف کے کٹہرے تک لے کر آئیں گے۔

انہوں نے مزید کہا کہ پوری قوم اس مشن میں متحد ہے اور ہر وہ انسان جو انسانیت پر یقین رکھتا ہے، ہندوستان کے ساتھ کھڑا ہے۔ میں اُن تمام ممالک اور عالمی رہنماؤں کا شکریہ ادا کرتا ہوں جو اس گھڑی میں ہمارے ساتھ کھڑے ہیں۔ امن اور سلامتی ہی ترقی کی بنیاد ہے۔