امریکی صدارتی انتخابات، جوبائیڈن کی کنارہ کشی کے امکانات میں اضافہ

مہر خبررساں ایجنسی نے امریکی ذرائع ابلاغ کے حوالے سے کہا ہے کہ گذشتہ دنوں پیش آنے والے واقعات اور صدر جوبائیڈن کی صحت کو مدنظر رکھتے ہوئے رواں سال ہونے والے صدارتی انتخابات سے ان کی کنارہ کشی کے امکانات بڑھ گئے ہیں۔

امریکی نیوز چینل سی این این نے اس حوالے سے کہا ہے کہ ڈیموکریٹ رہنما نے انکشاف کیا ہے کہ صدر جوبائیڈن نے کمیلا ہیرس کے انتخابات میں شامل ہونے کے بارے میں ان سے تبادلہ خیال کیا ہے۔

ذرائع نے سی این این کو بتایا کہ صدر جوبائیڈن انتخابی دوڑ سے کنارہ کشی اختیار کرنے کے لئے ذہنی طور پر آمادہ ہوچکے ہیں۔

دوسری جانب ای بی سی نے کہا ہے کہ سینیٹ میں ڈیموکریٹک پارٹی کے رہنما چیک شومر نے کہا ہے کہ پارٹی اور ملک کے مفاد میں یہی بہتر ہے کہ صدر جوبائیڈن انتخابی دوڑ سے الگ ہوجائیں۔

یاد رہے کہ صدر جوبائیڈن کی زبان اس وقت لکنت کا شکار ہوگئی تھی جب وہ اپنے مدمقابل ٹرمپ کے ساتھ انتخابی مباحثے میں شریک تھے۔ مباحثے کے دوران وہ اپنی بات کو واضح طور پر پیش کرنے میں ناکام رہے تھے۔ 

صدر جوبائیڈن کی صحت کو مدنظر رکھتے ہوئے اب تک متعدد ڈیموکریٹ اراکین کانگریس نے ان سے مطالبہ کیا ہے کہ ٹرمپ کے ساتھ مقابلے کے میدان سے باہر ہوجائیں۔