ماہِ رمضان میں مسجد پر بلڈوزر چلانا قابل مذمت ہے، کانگریس

مہر خبررساں ایجنسی نے بھارتی نیوز ایجنسی قومی آواز کے حوالے سے نقل کیا ہے کہ دہلی کے بنگالی مارکیٹ واقع مسجد میں موجود مدرسہ کو منہدم کیے جانے کا معاملہ سرخیوں میں ہے۔ اس معاملے میں دہلی پردیش کانگریس کمیٹی کے صدر چودھری انل کمار نے بی جے پی قیادت والی مرکز کی مودی حکومت کو شدید تنقید کا نشانہ بنایا ہے۔ چودھری انل کمار نے بنگالی مارکیٹ کی مسجد کا دورہ کیا اور کہا کہ ’’ماہِ رمضان میں مسجد کی کچھ تعمیرات کو ناجائز ٹھہرا کر بغیر کوئی نوٹس یا اطلاع دیے بلڈوزر چلا کر توڑنا بے حد افسوسناک ہے۔ مرکزی حکومت کے ذریعہ کی گئی کارروائی کی دہلی کانگریس مذمت کرتی ہے۔‘‘

چودھری انل نے مزید کہا کہ ’’اس مسجد میں چلے بلڈوزر پر دہلی کے وزیر اعلیٰ اروند کیجریوال اور دہلی وقف بورڈ کی خاموشی فکر انگیز ہے۔‘‘