بھارت میں سیکڑوں بھارتی پولیس اہلکار کورونا وائرس کا شکار

مہر خبررساں ایجنسی نے بھارتی ذرائع کے حوالے سے نقل کیا ہے کہ بھارت میں سیکڑوں بھارتی پولیس اہلکار حالیہ دنوں میں کورونا وائرس کا شکار ہوگئے۔ بھارت کی  مغربی ریاست مہاراشٹرا کے ایک سینئر افسر کا کہنا ہے کہ پچھلے ہفتے پولیس فورس میں کورونا وائرس کے کیسز کی تعداد تقریباً دگنی ہوگئی ہے۔ پولیس افسر کے مطابق  سب سے زیادہ متاثرہ ریاست مہاراشٹر میں منگل تک مجموعی طور پر 15 ہزار 515 کیسز رپورٹ ہوئے۔  اس ضمن میں ایک افسر نے اپنا نام ظاہر نہ کرنے کی شرط پر بتایا کہ ریاستی پولیس فورس کے 450 سے زاید اہلکاروں کے طبی نتائج مثبت آئے ہیں اور 4 وائرس کی وجہ سے ہلاک ہوچکے ہیں۔  واضح رہے کہ بھارت میں دنیا کا سب سے بڑا لاک ڈاؤن جاری ہے جس پر عملدرآمد کو یقینی بنانے کے لیے 30 لاکھ پولیس اہلکار ڈیوٹی کررہے ہیں۔ پولیس کے ایک سینئر عہدیدار کے مطابق گجرات میں کم از کم 155 پولیس اور نیم فوجی دستے وائرس سے متاثر ہیں۔

ریاست کے مرکزی شہر احمد آباد کے پولیس کمشنر نے خبررساں ادارے رائٹرز کو بتایا کہ 95 پولیس اور نیم فوجی دستے کوویڈ 19 کی وجہ سے ہسپتال میں داخل ہیں۔

وزارت داخلہ کے ایک سینئر عہدیدار نے بتایا کہ انہیں خدشہ ہے کہ ہزاروں مزید پولیس اہلکار میں وائرس کے نتائج مثبت آسکتے ہیں اور یہ وائرس پولیس ہاؤسنگ میں ان کے اہل خانہ میں منتقل ہوسکتا ہے۔