پاکستان میں سکیورٹی کی صورتحال سرمایہ کاری میں رکاوٹ ہے،جرمن چانسلر

مہر خبررساں ایجنسی نے ذرائع کے حوالے سے نقل کیا ہے کہ جرمنی کی وائس چانسلر اینجلا مرکل نے کہا ہے کہ پاکستان کے معاشی حالات مزید بہتر بنائے جاسکتے ہیں لیکن سکیورٹی کی صورتحال وہاں سرمایہ کاری میں رکاوٹ ہے اس لیے سرمایہ کاروں کو سرمایہ کاری کرنے کے لیے زبردستی نہیں کرسکتے۔ جرمنی کی وائس چانسلر اینجلا مرکل نے پاکستان کے وزیر اعظم نواز شریف سے ملاقات کے بعد برلن میں مشترکہ نیوز کانفرنس کرتے ہوئے کہا کہ ہم پاکستان کے ساتھ دوطرفہ تعلقات آگے بڑھانا چاہتے ہیں، انہوں نے کہا کہ پاکستان کے ساتھ معاشی تعاون کو مضبوط بنائیں گے کئی شعبوں میں پاکستان کی مدد کرنا چاہتے ہیں اور پاکستان اور یورپی یونین ممالک کے درمیان آزادانہ تجارت کی حمایت کریں گے۔ اینجلا مرکل نے کہا کہ افغانستان کو دوبارہ خطرے میں نہیں ڈالنا چاہتے، افغانستان میں استحکام پاکستان کے لیے بھی اہم ہوگا جب کہ پاک بھارت مذاکراتی عمل بھی بہتر ہونے کی امید ہے۔ انہوں نے نوبل انعام ملنے پر ملالہ یوسفزئی کو مبارکباد دیتے ہوئے کہا کہ ملالہ جیسی بہادر لڑکی پاکستان کی شناخت اور لوگوں کے لیے مشعل راہ ہے۔ اس موقع پر نوازشریف نے کہا کہ جرمن چانسلر کے ساتھ عالمی اور علاقائی امور پر بات چیت ہوئی، جرمنی کو پاکستان کی خارجہ پالیسی میں اہمیت حاصل ہے۔ انہوں نے کہا کہ ہائر ایجوکیشن سمیت کئی امور پر جرمنی کے ساتھ تعاون جاری ہے اور جرمن سرمایہ کاروں کی پاکستان میں توانائی کے شعبے میں دلچسپی ہے جبکہ انرجی فورم کےقیام پر جرمنی کا خیر مقدم کرتے ہیں۔ نوازشریف کا کہنا ہےکہ دہشت گردی کے ناسور کو جلد ختم کرنے کی امید ہے اور پاکستان جرمنی کے ساتھ مل کر اس کا دہشت گردی کا خاتمہ کرے گا۔