مقاومت صہیونی حکومت کو اس کے مذموم اہداف کے حصول میں سب سے بڑی رکاوٹ ہے، حزب اللہ

مہر خبررساں ایجنسی کی رپورٹ کے مطابق، حزب اللہ کی سیاسی کونسل کے نائب صدر محمود قماطی نے کہا ہے کہ اسرائیل بین الاقوامی قوانین کی پاسداری نہیں کرتا اور مسلسل لبنان میں معاہدوں کی خلاف ورزی کررہا ہے۔

انہوں نے زور دے کر کہا کہ صہیونی حکومت خطے میں مقاومت کو ختم کرنے کی کوشش میں ہے، لیکن حزب اللہ اور دیگر مزاحمتی قوتوں کی استقامت نے اسرائیل کو اپنے مقاصد حاصل کرنے سے روک رکھا ہے۔

قماطی نے مزید کہا کہ حزب اللہ نے اسرائیلی جارحیت کے خلاف ضبط و تحمل سے کام لیا تاکہ عالمی برادری کے سامنے صہیونی حکومت کی اصلیت کو بے نقاب کیا جاسکے۔

انہوں نے واضح کیا کہ حزب اللہ تنازع کو بڑھانے یا جنگ میں الجھنے کا خواہاں نہیں، لیکن مقاومت ہر طرح کے حالات کے لیے تیار اور چوکس ہے۔