داعش نے شام میں 300 افراد کے سرکاٹ دیئے

مہر خبررساں ایجنسی نے سانا کے حوالے سے نقل کیا ہے کہ شام اور عراق میں سرگرم وہابی دہشت گرد تنظیم داعش نے شامی شہر دیرالزور میں متعدد مقامات پر حملے کر کے 35 فوجیوں سمیت 300 سے زائد افراد کے سرکاٹ دیئے ہیں جب کہ 400 افراد کو یرغمال بنالیا ہے۔اطلاعات کے مطابق عالمی دہشت گرد تنظیم داعش نے شام کے مشرقی شہر دیر الزور میں 2 مختلف مقامات پر حملے کر کے 35 شامی فوجیوں اور 250 سے زائد عام شہری کے سرکاٹ دیئے۔ انسانی حقوق کی تنظیموں نے داعش کے حملے میں فوجیوں اور عام شہریوں کی ہلاکت کی تصدیق کرتے ہوئے کہا ہے کہ داعش نے شہر کے 60 فیصد حصے پر قبضہ کر لیا ہے، اس کے علاوہ داعش دہشت گردوں نے 400 افراد کو یرغمال بھی بنالیا ہے۔شام میں حقوق انسانی کے لئے کام کرنے والی برطانوی تنظیم کا کہنا ہے کہ داعش کے حملے میں ہلاک ہونے والوں میں بڑی تعداد عورتوں اور بچوں کی ہے۔ تنظیم کی رپورٹ میں مزید کہا گیا ہے کہ داعش کی جانب سے خون ریزری کا سلسلہ تاحال جاری ہے۔ وہابی دہشت گرد تنظیم داعش کو سعودی عرب اور خلیجی عرب ریاستوں سے بڑے پیمانے پر امداد ملتی ہے۔