مہر خبررساں ایجنسی کی رپورٹ کے مطابق، ایرانی مسلح افواج کے ترجمان بریگیڈیئر جنرل ابوالفضل شکارچی نے خبردار کیا ہے کہ ایران کی مسلح افواج آئندہ کسی بھی اسرائیلی جارحیت کی صورت میں پہلے سے کہیں زیادہ طاقتور اور تباہ کن جوابی کارروائی کے لیے پوری طرح تیار ہیں۔
انہوں نے کہا کہ قدس پر قابض صہیونی حکومت کی کسی بھی ممکنہ جارحیت کا ہمارا ردعمل زیادہ طاقتور، شدید اور مؤثر ہوگا جس سے دشمن کو شدید پچھتاوا ہوگا۔
جنرل شکارچی نے مزید کہا کہ عالمی ماہرین کی اکثریت اس بات پر متفق ہے کہ ایران نے حالیہ 12 روزہ جنگ میں اسرائیلی حکومت کو شکست دی اور اسے سخت نقصان پہنچایا۔ ہم نے اپنے حملوں کے ذریعے اس مجرم حکومت کو اپنی جارحیت روکنے پر مجبور کر دیا۔
جنرل شکارچی کے مطابق ایران کی مسلح افواج مکمل تیاری کی حالت میں ہیں۔ انہوں نے صہیونی حکومت کو سخت تنبیہ کرتے ہوئے کہا کہ اگر صہیونی حکومت نے دوبارہ کوئی اقدام کیا تو اسے شدید ترین ردعمل کا سامنا کرنا پڑے گا۔
اس سے قبل جمعہ کے روز سپاہ پاسداران انقلاب اسلامی کے ترجمان بریگیڈیئر جنرل علی محمد نائینی نے کہا تھا کہ اگر اسرائیل نے دوبارہ ایران پر حملہ کیا تو اسلامی جمہوریہ ایران کسی بھی قسم کی سرخ لکیر کا لحاظ نہیں کرے گا۔
آپ کا تبصرہ