مہر خبررساں ایجنسی کی رپورٹ کے مطابق، مقبوضہ فلسطین کے مرکزی علاقے کفریونا میں ایک گاڑی نے بس اسٹاپ پر موجود اسرائیلی فوجیوں کو کچل دیا، جس کے نتیجے میں 9 اہلکار زخمی ہوگئے۔
صہیونی پولیس کے مطابق یہ حملہ جان بوجھ کر کیا گیا اور حملہ آور موقع سے فرار ہونے میں کامیاب ہوگیا جس کی تلاش کے لیے پولیس نے ہیلی کاپٹروں کی مدد سے وسیع سرچ آپریشن شروع کردیا ہے۔
روزنامہ اسرائیل ہیوم نے اسرائیلی ایمبولینس سروس کے حوالے سے بتایا ہے کہ زخمیوں میں 6 کی حالت تشویشناک اور 3 معمولی زخمی ہیں۔ حملے کے بعد صہیونی فوج نے فوری طور پر مغربی کنارے کے علاقوں میں سخت سیکیورٹی اقدامات کیے، خاص طور پر عناب اور جباره چیک پوسٹوں کو بند کرکے تلاشی مہم تیز کردی گئی ہے۔
عبرانی میڈیا نے کہا ہے کہ تمام زخمی فوجی اہلکار ہیں جو بس اسٹاپ پر انتظار کررہے تھے۔ اس واقعے نے صہیونی انتظامیہ کو تشویش میں مبتلا کر دیا ہے۔ روزنامہ یدیعوت آحارانوت کے مطابق، کفریونا کے میئر نے کہا ہے کہ یہ ایک تشویشناک واقعہ ہے۔ آیندہ تمام بس اسٹاپوں پر سیکیورٹی سخت کی جائے گی تاکہ ایسے واقعات دوبارہ پیش نہ آئیں۔
دوسری جانب فلسطینی ذرائع نے الجزیرہ کو بتایا ہے کہ کارروائی کے بعد صہیونی فوج نے مغربی کنارے میں شہریوں کی نقل و حرکت محدود کردی ہے، اہم راستوں کو بند کرکے وسیع تلاشی کا عمل جاری ہے۔ حملہ آور کی شناخت اور سرگرمیوں کے بارے میں اب تک کوئی معلومات سامنے نہیں آئی ہیں۔
آپ کا تبصرہ