تھائی لینڈ میں بس حادثہ، 18افراد ہلاک ،20زخمی

مہر خبررساں ایجنسی نے رائٹرز کے حوالے سے نقل کیا ہے کہ تھائی لینڈ کے دارالحکومت بنکاک کے قریب ٹیلی کام کمپنی کے ریٹائرڈ ملازمین کی گاڑی گہری کھائی میں جاگری جس کے نتیجہ میں18 ملازمین ہلاک جبکہ 20 زخمی ہوگئے ہیں۔ ٹیلی کام کمپنی کے ریٹائرڈ ملازمین سرکاری ٹرانسپورٹ حاصل کر کے شمالی علاقے میں سیر و سیاحت کے لئے جارہے تھے کہ ڈرائیور کو راستے کی واقفیت نہ ہونے پر ایک اترائی کے دوران بس کی بریک فیل ہوگئی جس کی وجہ سے خوفناک حادثہ پیش آیا۔ گہری کھائی میں بس گرنے سے امدادی کاموں اور زخمیوں کو نکالنے میں شدید مشکلات کا سامنا کرنا پڑا ،امدادی اداروں نے رسیوں کی مدد سے گہرائی میں سے زخمیوں کو نکالا جبکہ امدادی کارکنوں کو مقامی ملٹری یونٹ نے 2 کرینیں بھی فراہم کیں تھیں ۔مقامی پولیس کا کہنا ہے کہ بس ڈرائیور کو زخمی حالت میں ہسپتال منتقل کر دیا گیا ہے جیسے ہی اسے ہوش آئے گا حادثے کے بارے میں اس سے سوال کئے جائیں گے۔