سیکورٹی اہلکار دہشت گردوں کے لئے میدان خالی نہیں کریں گے، جنرل موسوی

مہر خبررساں ایجنسی کی رپورٹ کے مطابق، ایرانی مسلح افواج کے چیف آف اسٹاف میجر جنرل سید عبدالرحیم موسوی نے امریکہ اور صہیونی حکومت مخالف عظیم الشان ریلیوں پر عوام کا شکریہ ادا کیا اور کہا ہے کہ امریکہ اور اسرائیل نے 12 روزہ جنگ میں ہونے والی شکست کا بدلہ لینے کے لئے داعشی دہشت گردوں کو ایرانی عوام کے خلاف میدان میں اتارا ہے۔ دہشت گردوں نے وحشی جانوروں کی طرح سیکورٹی فورسز پر حملہ کیا اور انتہائی دردناک طریقے سے ان کو شہید کردیا۔

انہوں نے کہا کہ دہشت گردوں نے پرامن مظاہرین کے درمیان داخل ہوکر ہنگامے کیے تاہم سیکورٹی فورسز نے نہتے عوام کی جان بچانے کے لئے فائرنگ سے گریز کیا اور اپنی جانیں قربان کردیں۔

اپنے پیغام میں انہوں نے مزید کہا کہ داعشی دہشت گرد موساد اور سی آئی اے کے کنٹرول میں تھے۔ انہوں نے انسانیت سوز جرائم کیے اور اپنے آقاؤں کو خوش کرنے کے لئے نہتے عوام اور سیکورٹی فورسز کو شہید کردیا۔