پاکستان میں شدید بارشوں سے 61 افراد ہلاک اور 112 زخمی

مہر خبررساں ایجنسی نے پاکستانی ذرائع کے حوالے سے نقل کیا ہے کہ پاکستان بھر میں گذشتہ ایک ہفتے کے دوران شدید بارشوں سے 61 افراد ہلاک اور 112 زخمی ہوگئے ہیں۔ پاکستان میں قدرتی آفات سے نمٹنے والے ادارے نیشنل ڈیزاسٹر مینجمنٹ اتھارٹی نے مون سون کی حالیہ بارشوں میں ہونے والے جانی و مالی نقصان کی تفصیلات جاری کردی ہیں۔ این ڈی ایم اے کی رپورٹ کے مطابق گزشتہ ایک ہفتے میں شدید بارشوں کے باعث 61 افراد جاں بحق اور 112 زخمی ہوئے۔

پنجاب میں 5 بچوں سمیت 29 افراد جاں بحق ہوئے۔ خیبر پختونخوا میں 8 بچوں اور 3 خواتین سمیت 15 افراد کی ہلاکت ہوئی۔ آزادکشمیر، قبائلی علاقہ جات میں 7، 7 اموات ہوئیں۔ بلوچستان میں 1 اور گلگت بلتستان میں 2 افراد کے جاں بحق ہونے کی اطلاع ملی۔

مون سون کی بارشوں کے باعث 165 گھروں کو نقصان پہنچا، جب کہ سب سے زیادہ مالی نقصان خیبرپختونخوا اور گلگت بلتستان میں ہوا ہے۔