میانمار میں لینڈ سلائیڈنگ سے 90 سے زائد کان کن ہلاک

مہر خبررساں ایجنسی نے فرانسیسی خبررساں ایجنسی کے حوالے سے نقل کیا ہے کہ میانمار میں قیمتی پتھروں کی ایک کان  کے قریب لینڈ سلائیڈنگ کے نتیجے میں 90 سے زائد مزدور ہلاک ہوگئے جب کہ 100 سے زائد افراد تاحال لاپتہ ہیں۔ یہ حادثہ میانمار کی شمالی ریاست کاچن کے علاقے ہپاکانت میں پیش آیا جہاں قیمتی پتھر فیروزے کی ایک کان سے نکالا گیا ملبہ جو کہ بڑے وسیع علاقے میں پھیلا ہوا تھا اچانک دھنس گیا اور وہاں موجود مزدوروں پر آگرا۔ ایک سرکاری اہلکار نے نام نہ بتانے کی شرط پر بتایا کہ یہ حادثہ رات کے وقت پیش آیا جب کان کن اپنے خیموں میں سورہے تھے جس کے باعث بڑی تعداد میں مزدور ملبے میں پھنس گئے،مرنے والے مزدوروں کا تعلق ملک کے مخلتف علاقوں سے بتایا جاتا ہے۔حادثے کے بعد ریسکیو اہلکار جائے واقعہ پر پہنچ گئے اور انہوں نے مقامی افراد کے ساتھ مل ملبے کو ہٹانا شروع کردیا۔