بلاول بھٹو زرداری پر طالبان دہشتگردوں کے حملے کا خدشہ

مہر خبررساں ایجنسی نے پاکستانی ذرائع کے حوالے سے نقل کیا ہے کہ پاکستان کے صوبہ سندھ کی حکومت نے پاکستان پیپلز پارٹی کے چیئرمین بلاول بھٹو زرداری پر دہشتگردوں کے حملے کا خدشہ ظاہر کرتے ہوئے رینجرز اور پولیس کو ان کی سیکیورٹی کے انتظامات مزید سخت کرنے کی ہدایت کی ہے۔

صوبہ سندھ کی وزارت داخلہ  کی جانب سے سندھ رینجرز اور آئی جی پولیس کو بھجوائے گئے مراسلے میں کہا گیا ہے کہ طالبان دہشت گردوں سے وابستہ کالعدم دہشتگرد تنظیم جند اللہ کی جانب سے بلاول بھٹو زرداری کو نشانہ بنانے کی منصوبہ بندی کی جارہی ہے، اس لئے پولیس اور رینجرز پاکستان پیپلز پارٹی کے چیئرمین کی حفاظت اور سیکیورٹی کے لئے موثر اقدامات کرے۔واضح رہے کہ پاکستان پیپلز پارٹی 18 اکتوبر کو کراچی میں جلسہ کررہی ہے جس میں بلاول بھٹو زرداری خصوصی خطاب کریں گے۔