جنگ بندی مذاکرات میں مشروط نرمی کے لئے آمادہ ہیں، حماس رہنما

مہر خبررساں ایجنسی نے المیادین کے حوالے سے خبر دی ہے کہ لبنان میں حماس کے نمائندے احمد عبدالہادی نے کہا ہے کہ اس تحریک نے جنگ بندی کے مذاکرات اور قیدیوں کے تبادلے کو فعال کرنے کے لیے ایک نیا آپشن دیا ہے، بشرطیکہ جنگ روکنے کی بین الاقوامی ضمانتیں ہوں۔

احمد عبدالہادی نے المیادین کو انٹرویو دیتے ہوئے کہا کہ حماس نے جنگ بندی کے مذاکرات کو فعال کرنے کے بارے میں اپنا نقطہ نظر پیش کیا، جس میں اس تحریک کی شرائط 3 مراحل پر مشتمل تھیں۔

انہوں نے مذاکرات میں حائل صہیونی دشمن کی رکاوٹوں کی طرف اشارہ کرتے ہوئے کہا: حماس نے قیدیوں کے تبادلے کے معاملے میں لچک دکھائی ہے لیکن غزہ کے خلاف جارحیت کو مکمل طور پر روکنے کے لیے بین الاقوامی ضمانتوں کے بغیر اس کا حصول ممکن نہیں ہے۔ 

حماس کے اس عہدیدار نے مزید کہا: "آج گیند صیہونی حکومت اور امریکہ کے کورٹ میں ہے۔" نیتن یاہو اپنے مفادات کے لیے جنگ کو جاری رکھنے اور پھیلانے کی کوشش کر رہے ہیں۔ کیونکہ جنگ روکنے کا مطلب نیتن یاہو کا ٹرائل اور جیل کی سزا ہے۔

احمد عبدالہادی نے مذاکرات میں امریکہ کے کردار اور پوزیشن کے بارے میں کہا: امریکی حکومت کا دوہرا رویہ ہے اور وہ غزہ تک امداد کی آمد کے حوالے سے بات کرتے ہوئے قابض حکومت پر جارحیت روکنے کے لئے دباؤ ڈالنے کے لیے کوئی اقدام نہیں کرتی۔ 
لبنان میں حماس کے نمائندے نے تاکید کی: دشمن اس وقت غزہ میں جن جرائم کا ارتکاب کر رہا ہے اور رفح پر حملہ کرنے کا خطرہ ہے، وہ سب مذاکرات میں مزاحمت پر دباؤ ڈالنے کے مقصد سے ہیں۔ لیکن مزاحمت میدان میں  بہت مضبوط پوزیشن  میں ہے اور غزہ کے تمام علاقوں میں پوری طاقت کے ساتھ جنگ لڑ رہی رہی ہے۔

انہوں نے غزہ کے انتظام کے لیے مزاحمتی گروپوں کی ایک کمیٹی کی تشکیل کا حوالہ دیتے ہوئے کہا: یہ بات واضح ہوچکی ہے کہ میدان جنگ ہی اگلے مرحلے کے فیصلوں اور اقدامات کا تعین کرتا ہے۔ 
آخر میں حماس، تمام فلسطینی عوام  اوریمن سے لے کر عراق اور لبنان تک کے مزاحمتی گروہوں کا شکریہ ادا کرتے ہیں۔