عین الاسد پر ایرانی حملے کے جواب کی صورت میں امریکہ کے 400 ٹھکانوں پر حملہ یقینی تھا

مہر خبررساں ایجنسی کے نامہ نگار کی رپورٹ کے مطابق اسلامی جمہوریہ ایران کی ایرو اسپیس فورس کے سربراہ جنرل حاجی زادہ نے ایرانی ٹی وی کے ساتھ گفتگو میں عراق میں امریکہ کے فوجی اڈے عین الاسد پر ایران کے میزائل حملوں کی طرف اشارہ کرتے ہوئے کہا ہے کہ اگر امریکہ عین الاسد پر ایران کے حملے کا جواب دیتا تو ایران جوابی کارروائی میں امریکہ کے 400 ٹھکانوں کو میزائلوں سے نشانہ بناتا اور ایرانی فورس اس کے لئے مکمل طور پر آمادہ تھیں اور ہمارا خيال تھا کہ امریکہ ضرور جواب دےگا اور امریکی جوابی حملے کی صورت میں ہم امریکہ کے 400 ٹھکانوں کو میزائلوں سے نشانہ بنائیں گے۔ انھوں نے کہا کہ آج ایران کی دفاعی پوزیشن اتنی قوی اور مضبوط ہے کہ امریکہ جیسا دشمن بھی ایران پر حملے سے پہلے فکر کرنے پر مجبور ہوجاتا ہے۔ سپاہ پاسداران انقلاب اسلامی کے ایرواسپیس فورس کے کمانڈر بریگیڈیئر جنرل امیر حاجی زادے نے ایران کے نور سٹیلائٹ کو خلاء میں بھیجنے کی طرف اشارہ کرتے ہوئے کہا کہ خلاء میں  ایرانی کی موجودگی بہت ضروری تھی ، ایران نے خلا ءمیں سٹیلائٹ روانہ کرکے ثابت کردیا ہے کہ ایران بروقت قدم اٹھا کر درست سمت میں تیزی کے ساتھ قدم آگے بڑھا رہا ہے اور ایران کا یہ سٹیلائٹ ہر ڈیڑھ گھنٹے میں زمین کا چکّر لگا رہا ہے اور ایران کی بہت سی دفاعی ضروریات بھی پوری ہو گئی ہیں۔ ہمارا سیٹلائٹ دنیا کے گرد چکر لگا کر ہمیں اطلاعات فراہم کررہا ہے خلاء میں ایران کی موجودگی ایران کی بہت بڑی کامیابی کا مظہر ہے۔