بہاولپور میں ٹریفک حادثے میں 6 افراد ہلاک

مہر خبررساں ایجنسی نے ایکسپریس کے حوالے سے نقل کیا ہے کہ پاکستان میں بہاولپور کے علاقہ چنی گوٹھ کے قریب مسافر بس کو پیش آنے والے حادثے کے نتیجے میں 6 افراد ہلاک جب کہ 37 زخمی ہوگئے ہیں۔ اطلاعات کے مطابق بہاولپور کے علاقے چنی گوٹھ کے قریب مسافر بس بے قابو ہوکر پل سے نیچے جاگری۔ واقعے کی اطلاع ملتے ہی احمد پور شرقیہ اور لیاقت پور سے ریسکیو 1122 کی ٹیمیں موقع پر پہنچ گئیں۔ ریسکیو ٹیموں نے بس کی باڈی کاٹ کر 3 لاشوں اور 40 زخمیوں کو نکال کر قریبی اسپتالوں میں منتقل کردیا جہاں مزید 3 زخمی دم توڑ گئے۔ طبی حکام کے مطابق  زخمیوں میں خواتین اور بچے بھی شامل ہیں۔ زخمیوں کو طبی امداد فراہم کی جارہی ہے جن میں سے کئی کی حالت تشویشناک ہے۔