امریکی باکسر محمد علی کلے کی نماز جنازہ ادا کردی گئی

مہر خبررساں ایجنسی نے ایسوسی ایٹڈ پریس کے حوالے سے نقل کیا ہے کہ امریکی ریاست کینٹکی کے شہر لوئی ویلی میں دنیا کے عظیم باکسر محمد علی کلے کی نمازِ جنازہ ادا کردی گئی جس میں دنیا بھر سے ہزاروں افراد نے شرکت کی۔ محمد علی کلے کا  4 جون 2016 کو 74 برس کی عمر میں انتقال ہوگيا تین مرتبہ ہیوی ویٹ چیمپیئن شپ جیتنے والے عظیم باکسر محمد علی ایک طویل عرصے سے سانس کی بیماری میں مبتلا تھے۔ واضح رہے کہ محمد علی 17 جنوری 1942 میں امریکہ میں  پیدا ہوئے اوران کا نام کیسیئس مارسیلس کلے جونیئر تھا، 1964 میں اسلام قبول کرنے کے بعد ان کا نام محمد علی رکھا گیا۔  محمد علی نے کھیل کے علاوہ امریکہ میں سیاہ فام آبادی کے حقوق کے لئے بھی نمایاں کام انجام دیئے۔