چنائی میں ہسپتال کی بجلی بند ہونے سے 18مریض ہلاک

مہر خبررساں ایجنسی نے بھارتی ذرائع کے حوالے سے نقل کیا ہے کہ سیلاب سے تباہ حال بھارتی شہر چنائی میں ایک ہسپتال میں بجلی منقطع ہونے کی وجہ سے اٹھارہ مریض ہلاک ہو گئے ہیں۔ حکام نے بتایا ہے کہ سیلابی پانی نے ہسپتال کے جنریٹرز خراب کر دیے، جس کہ وجہ سے انتہائی نگہداشت یونٹ میں مریضوں کو مشینوں کے ذریعے مصنوعی تنفس دینے کا عمل رک گیا۔ تامل ناڈو ریاست کی حکومت نے اس ہسپتال میں بجلی کی بحالی ممکن بناتے ہوئے اس حادثے کی وجوہات کے لیے تفتیشی عمل شروع کر دیا ہے۔ تامل ناڈو میں حالیہ بارشوں اور سیلاب سے روزمرہ زندگی بھی مفلوج ہو کر رہ گئی ہے۔دوسری جانب حکام کا کہنا ہے کہ بھارت کی جنوبی ریاست تامل ناڈو کے دارالحکومت چنائی میں امدادی کام تیزی سے جاری ہے اور بعض علاقوں میں سیلابی صورت حال کے کئی دنوں بعد بجلی بحال کر دی گئی ہے۔ بارش اور سیلاب سے متاثر ہزاروں لوگوں تک کھانا اور ادویات پہنچانے کی کوشش کی جا رہی ہے۔اطلاعات کے مطابق چنائی ریلوے سٹیشن اور ایئرپورٹ جو کہ پانی سے بھر گئے تھے وہ ہفتے سے جزوی طور پر کام کرنا شروع کر دیں گے۔ 100 سال میں ہونے والی اس شدید ترین بارش میں تقریبا 280 افراد ہلاک ہو چکے ہیں جبکہ بہت سے لوگ عارضی کیمپوں میں رہ رہے ہیں۔