امریکہ اور چین کے درمیان 250 ارب ڈالر کے معاہدے

مہر خبررساں ایجنسی نے رائٹرز کے حوالے سے نقل کیا ہے کہ امریکہ اور چین کے درمیان 250 ارب ڈالر سے زائد مالیت کے تجارتی معاہدے طے پاگئے ہیں۔اطلاعات کے مطابق امریکی صدر ڈونلڈ ٹرمپ کے دورہ  چین کے موقع پر بیجنگ میں دونوں ممالک کی بڑی کمپنیوں کے درمیان 250 ارب ڈالرسے زائد مالیت کے معاہدوں پر دستخط  ہوئے اور اس تقریب میں  صدر ڈونلڈٹرمپ اورصدر  ژی جن پنگ بھی موجود تھے۔ معاہدوں کے مطابق چینی کمپنیاں امریکہ سے 300 بوئنگ طیاروں کی خریداری سمیت انفرانسٹرکچر،ٹیلی کمیونی کیشن  اور دیگر شعبوں میں سرمایہ کاری کریں گی جب کہ امریکی کمپنیاں چین سے کاروں کے پرزے سمیت دیگر شعبوں میں خریداری کریں گی۔موبائل فون بنانے والی چینی کمپنیوں  اوپو اور ویوو کا امریکی ٹیلی کام موبائل کمپنی قوالکوم سے مصنوعات کی خریداری کا بھی معاہدہ  ہوا ہے۔ چین نے امریکہ کو اپنی تجارتی منڈیوں میں رسائی دینے کی یقین دہانی کراتے ہوئے امریکی کمپنیوں کو " ون بیلٹ ون روڈ "  پروگرام کے منصوبوں میں حصہ لینے کی پیشکش کی جس پر امریکی صدر نے خوشی کا اظہار کیا۔ اس موقع پر امریکی صدر کا کہنا تھا کہ روس اور چین کے تعاون سے شمالی کوریا کے مسئلے کو تیزی اور آسانی سے حل کیا جاسکتا ہے۔