روس کے علاقہ سائبیریا میں روسی ہیلی کاپٹر تباہ ہونے سے 19افراد ہلاک

مہر خبررساں ایجنسی نے روسیا الیوم کے حوالے سے نقل کیا ہے کہ روس میں  سائبیریا کے شمال مغربی علاقے میں ہیلی کاپٹر تباہ ہونے سے 19افراد ہلاک ہو گئے ہیں ۔ اطلاعات کے مطابق سائبیریا کے شمال مغربی علاقے میں ایم آئی 8فوجی ہیلی کاپٹر گر کر تباہ ہو گیا ، حادثے کے وقت ہیلی کاپٹر میں22افراد سوار تھے جن میں سے 19ہلاک ہو گئے جبکہ تین کو زندہ بچا لیا گیا ہے۔حادثہ خراب موسم کی وجہ سے پیش آیا ۔
روسی ایمرجنسی سروسز  کا کہنا ہے کہ ہیلی کاپٹرکریش لینڈنگ کا شکار ہوا تاہم زخمیوں کو فوری طور پر ایئر ایمبولینس کے ذریعے ہسپتال منتقل کر دیا گیا ہے اور جائے حادثہ پر ریسکیو آپریشن تاحال جاری ہے جبکہ ہلاک ہونے والوں کی لاشیں بھی نکالی جا رہی ہیں ۔
حادثے کے فوری بعد ہیلی کاپٹر کے ذریعے ریسکیو ٹیموں کو روانہ کیا گیا جنہوں نے زخمیوں کو نکال کر ابتدائی طبی امداد کے بعد ہسپتال منتقل کر دیا ہے تاہم ابھی بھی ملبے سے لوگوں کی تلاش جاری ہے ۔
ریسکیو ٹیموں نے ہیلی کاپٹر کے دو بلیک باکس بھی تلاش کر لیے ہیں جو بالکل درست حالت میں بتائے جاتے ہیں جن سے حادثے کے محرکات کا پتہ لگانے میں مدد لی جائے گی ۔