پاکستان میں مکان کی چھت گرنے سے ایک ہی خاندان کے 3 افراد جاں بحق

مہر خبررساں ایجنسی نے ایکسپریس کے حوالے سے نقل کیا ہے کہ پاکستان میں جمرود کے علاقے طور خیل میں مکان کی چھت گرنے سے ایک ہی خاندان کے 3 افراد جاں بحق اور 6 زخمی ہوگئے ہیں۔ اطلاعات کے مطابق خیبر ایجنسی میں جمرود کے علاقے طور خیل میں بارش کے باعث خستہ حال مکان کی چھت اچانک منہدم ہوگئی جس کے باعث ایک ہی خاندان کے 3 افراد جاں بحق اور6 زخمی ہوگئے۔ چھت گرنے کی وجہ سے مکان کا ایک بڑا حصہ مکمل  طور پر تباہ ہوگیا۔ حادثے کی اطلا ع ملتے ہی ریسکیو اہلکاروں نے موقعے پر پہنچ کر زخمیوں اور لاشوں کو جمرود اسپتال منتقل کردیا۔ جاں بحق ہونے والوں میں ماں، بیٹا اور بھانجا شامل ہیں۔