افغانستان کے سرحدی علاقہ میں طالبان کے حملے میں 8 اہلکار ہلاک

مہر خبررساں ایجنسی نے طلوع نیوز کے حوالے سے نقل کیا ہے کہ افغانستان کے پاکستان سے منسلک سرحدی علاقے طورخم پر افغان پولیس چیک پوسٹ پر طالبان کے حملے کے نتیجے میں 8 اہلکار ہلاک ہوگئے ہیں۔اطلاعات کے مطابق مسلح افراد نے رات 8 بجے طورخم کی خیبر نامی پولیس چیک پوسٹ کو گھیرے میں لے کر اہلکاروں پر فائرنگ کردی۔ فائرنگ کے نتیجے میں چیک پوسٹ میں موجود 8 پولیس اہلکار ہلاک ہوگئے اور حملے کے بعد مسلح افراد نے چیک پوسٹ پر موجود اسلحہ اور دیگر سامان قبضے میں لے لیا۔افغان ذرائع کا کہنا تھا کہ فورسز نے کچھ گھنٹوں تک جاری رہنے والی جوابی کارروائی کے بعد چیک پوسٹ کو دوبارہ حاصل کرلیا ہے۔