مہر خبررساں ایجنسی نے غیر ملکی ذرائع کے حوالے سے نقل کیا ہے کہ اٹلی میں سکیورٹی فورسز نے برطانیہ اور فرانس سمیت اٹلی پر دہشت گرد حملوں کی منصوبہ بندی کرنے والے 2 دہشت گردوں کو گرفتار کرلیا ہے جن کا تعلق افغانستان سے ہے۔
اطلاعات کے مطابق اٹلی کے شہر باری میں سکیورٹی فورسز نے کارروائی کے دوران برطانیہ، فرانس اور اٹلی پر دہشت گرد حملوں کی منصوبہ بندی کے الزام میں 2 افغان باشندوں کو گرفتار کرلیا جب کہ ان کے مزید 3 ساتھیوں کی تلاش جاری ہے جن میں سے 2 کا تعلق افغانستان اور ایک کا پاکستان سے ہے جب کہ گرفتار 2 افراد کا تعلق بھی افغانستان سے ہے۔ پولیس کے مطابق گرفتار افراد لندن اور فرانس میں ہوٹلوں، شاپنگ پلازہ اور ائیر پورٹ سمیت اٹلی کے مشہور مقامات کو دہشت گردی کی کارروائیوں کا نشانہ بنانا چاہتے تھے۔
اطالوی حکام کے مطابق گرفتار افراد دسمبر میں شاپنگ پلازہ اور دیگر حساس مقامات کی تصاویر اور ویڈیوز بنانے کے بعد سکیورٹی اداروں کی نظر میں آئے جب کہ ان کے موبائل فون سے ملنے والی تصاویر میں پیرس اور لندن کے ائیرپورٹ سمیت اٹلی کے مشہور اور حساس مقامات کی تصاویر ملی ہیں جس سے واضح ہوتا ہے کہ یہ افراد سیاح کے طور پر تصاویر نہیں اتاررہے تھے اور ان کا مقصد تخریب کاری کی کارروائی کرنا تھا۔
آپ کا تبصرہ