ایران کی طرف سے پاکستان کے صوبہ سندھ کو 200 بسیں دینے کی پیشکش

مہر خبررساں ایجنسی نے ڈان کے حوالے سے نقل کیا ہے کہ پاکستان کے صوبہ سندھ کے وزیر برائے ٹرانسپورٹ ناصر حسین شاہ نے ایرانی قونصل جنرل کی جانب سے ٹرانسپورٹ کے مختلف شعبوں میں مدد کرنے اور کراچی میں عوامی سفر کی سہولیات بہتر بنانے کے لیے 200 بسوں کی پیشکش کی تعریف کی ہے۔ ایرانی قونصل جنرل مہدی سبحانی نے وفد کے ساتھ صوبائی وزیر ٹرانسپورٹ سید ناصر شاہ سے ملاقات کی، جس کے بعد جاری کیے گئے بیان میں وزیر ٹرانسپورٹ نے کہا کہ عوام کو جدید ٹرانسپورٹ کی سہولیات میسر کرنا حکومت کی اولین ترجیح ہے اور اس حوالے سے کئی منصوبوں پر کام جاری ہے۔ ناصر حسین شاہ کا کہنا تھا کہ اس وقت شہر میں جدید ٹرانسپورٹ کی سہولیات فراہم کرنے کے لیے  گرین لائن اور اورنج لائن بس سروسز کے منصوبوں سمیت اربوں روپے کے منصوبے زیر تعمیر ہیں، جن کی تکیمل کے بعد لوگوں کو سفر کی معیاری اور بہتر سہولیات میسر ہوسکیں گی۔ ملاقات کے دوران ایرانی قونصل جرنل مہدی سبحانی نے صوبائی وزیر کو ٹرانسپورٹ کی سہولیات بہتربنانے کے لیے ایرانی حکومت کی جانب سے 200 بسوں کی فراہمی کی پیش کش بھی کی۔ایرانی قونصل جرنل نے صوبائی وزیر کو ایران کے دارالحکومت تہران میں کام کرنے والے جدید شہری ٹرانسپورٹ نظام کو دیکھنے کے لیےدورے کی دعوت بھی دی۔