ہندوستان میں ٹرین حادثہ میں ہلاکتوں کی تعداد 133 تک پہنچ گئی

مہر خبررساں ایجنسی نے ہندوستانی ذرائع کے حوالے سے نقل کیا ہے کہ ہندوستان کے شمال مشرقی شہر پٹنہ اور مشرقی شہر اندور کے درمیان چلنے والی مسافر ٹرین کانپور کے قریب پٹری سے اتر گئی جس کے نتیجے میں ہلاکتوں کی تعداد 133 تک پہنچ گئی جبکہ زخمیوں کی تعداد 200 سے زائد ہے۔ پولیس کا کہنا تھا کہ حادثہ ہفتہ اور اتوار کی درمیانی شب رات 3 بج کر 10 منٹ کے قریب پیش آیا جب زیادہ تر مسافر سو رہے تھے جبکہ مقامی میڈیا رپورٹس میں بتایا گیا کہ پٹنہ اندور ایکسپریس کی 14 بوگیاں پٹری سے اتریں جس کی وجہ سے بڑے پیمانے پر جانی و مالی نقصان ہوا۔ حادثے کا شکار ہونے والی ٹرین میں 500 کے قریب مسافر سوار تھے جبکہ حکام کا کہنا ہے کہ وہ حادثے کی وجہ جاننے کی کوشش کررہے ہیں اور ہوسکتا ہے کہ پٹری میں دراڑ یا ٹوٹ پھوٹ کی وجہ سے ٹرین کو حادثہ پیش آیا۔