مہر خبررساں ایجنسی نے النشرہ کے حوالے سے کہا ہے کہ لبنان کی مقاومتی تنظیم حزب اللہ نے مالکیہ میں صہیونی فورسز کی تنصیبات پر حملے کا دعوی کیا ہے۔ تنظیم نے ایک بیان میں کہا ہے کہ صہیونی حکومت کی جانب سے لبنانی علاقوں پر حملے کے جواب میں حزب اللہ کے شہید محمود بیزی یونٹ اور شہید مہدی عطوف یونٹ کے جوانوں نے مالکیہ میں صہیونی فوجی تنصیبات پر میزائل حملے کیے ہیں بیان میں کہا گیا ہے کہ میزائلوں اور اتش گیر مادوں سے ہونے والے حملوں میں صیہونی فوجی تنصیبات کو شدید نقصان پہنچا ہے۔
کفر شوبا اور شیبا فارم کے علاقوں میں بھی لبنانی سرحد سے حملوں کی خبریں موصول ہورہی ہیں۔ دراین اثناء المیادین نے کہا ہے کہ الطحیات میں صہیونی فوجی تنصیبات پر لبنانی مجاہدین نے حملہ کرکے شدید نقصان پہنچایا ہے۔ جبکہ صہیونی ذرائع ابلاغ کے مطابق لبنان سے 10 میزائل مقبوضہ علاقوں پر فائر کئے گئے ہیں۔