مصر کی شام میں داعش کے خلاف روسی حملوں کی حمایت

مہر خبررساں ایجنسی کی رپورٹ کے مطابق مصری وزیر خارجہ سامح شکری نے العربیہ کے ساتھ گفتگو میں  شام میں داعش کے خلاف روس کے ہوائی حملوں کا خیر مقدم کرتے ہوئے کہا ہے کہ روس کے فضائی حملوں سے داعش دہشت گرد محاصرے میں آجائيں گے۔ مصری وزیر خارجہ نے کہا کہ روس دہشت گردی کے خلاف سنجیدہ کارروائی کررہا ہے۔ مصری وزیر خارجہ نے کہا کہ روس کی شام میں موجودگی اچھی بات ہے اور روس شام اورعراق میں موجود داعش دہشت گردوں پر کاری ضرب وارد کرنے کی بھر پور صلاحیت رکھتا ہے۔ واضح رہے کہ روس نے شامی حکومت کی اجازت کے بعد داعش کے خلاف فضائی کارروائی کا آغاز کیا ہے جس پر ترکی، سعودی عرب اور امریکہ نے برہمی کا اظہار کیا ہے۔