مہر خبررساں ایجنسی کے مطابق، اقوام متحدہ میں ایران کے مستقل نمائندے سعید ایروانی نے انٹونی گوتریش اور سلامتی کونسل کے سربراہ کے نام ایک خط میں کہا ہے کہ یمن کے بارے میں ہونے والے اقوام متحدہ کے اجلاس کے دوران امریکہ کا ایران مخالف بیان قابل مذمت ہے۔
ایرانی اعلی سفارتکار نے کہا ہے امریکی نمائندے نے یمن کے خلاف اپنے غیر قانونی اقدامات کو جواز دینے کے لئے عالمی ادارے کا پلیٹ فارم دوبارہ استعمال کیا اور ایران کے خلاف پروپیگنڈا کیا جس کا زمینی حقائق سے کوئی تعلق نہیں ہے۔
انہوں نے تاکید کی کہ ایران امریکی بیانات کو مکمل مسترد کرتا ہے۔ ایران سلامتی کونسل میں یمن کے بارے میں منظور ہونے والی قراردادوں کی پابندی کرتا ہے اور اب تک یمن میں کوئی غیر قانونی اقدام نہیں کیا ہے۔
ایروانی نے مزید کہا کہ ایران یمن کے بحران کو سفارتی طریقے سے حل کرنے کی حمایت کرتا ہے۔ انہوں نے سلامتی کونسل کے سربراہ سے درخواست کی کہ خط کو سلامتی کونسل کی اسناد میں محفوظ کیا جائے۔