مہر خبررساں ایجنسی کی رپورٹ کے مطابق اسلامی جمہوریہ ایران کی مسلح افواج کے چیف آف جنرل اسٹاف میجر جنرل باقری اور ایرانی فوج کے سربراہ میجر جنرل موسوی کی موجودگی میں حیدر1 ڈرون اور حیدر 2 کروز میزائل کی رونمائي کی گئی۔
اطلاعات کے مطابق ایران کی مسلح افواج کے چیف آف جنرل اسٹاف میجر جنرل باقری نے ایرانی فوج کے 313 ویں اسٹراٹیجک بیس کا دورہ کیا ۔ جہاں انھوں نے جنگی ڈرونز طیاروں، میزائلوں اور الیکٹرانک سسٹمزپر مشتمل دفاعی نظام کا قریب سے مشاہدہ کیا۔ میجر جنرل باقری نے اس موقع پر حیدر1 ڈرون اور حیدر 2 کروز میزائل کی رونمائي بھی کی۔
میجر جنرل باقری نے اس موقع پر کہا کہ ہم خطرے کو کم نہیں سمجھتے، ہم اپنے دفاعی سسٹم کو جدید ترین بنانے میں ایک لمحہ بھی تاخیر نہیں کرتے۔ ایران آج پیشرفتہ ڈرونز بنانے والے ممالک کی صف میں شامل ہوگيا ہے۔ ملکی اور قومی دفاع میں ہم سنجیدہ ہیں۔ ہم پرانے ہتھیاروں کو بھی جدید ترین ہتھیاروں میں تبدیل کرنے کی کوشش کررہے ہیں۔ ایران کی مسلح افواج ملک اور قوم کے دفاع کے لئے ہمہ وقت آمادہ ہیں۔ ہمارے جوان پیشرفتہ ہتھیاروں کے ساتھ ساتھ ایمانی قوت سے بھی سرشار ہیں۔