امریکہ کا سعودی عرب کو 30کروڑ ڈالرمالیت کی میزائل ٹیکنالوجی فروخت کرنے کا اعلان

مہر خبررساں ایجنسی نے واشنگٹن پوسٹ کے حوالے سے نقل کیا ہے کہ یمن کی جنگ میں عام شہریوں کی ہلاکتوں پر امریکہ نے سعودی عرب کو ہتھیاروں کی فروخت عارضی طور پر بند کر دی تھی لیکن اب امریکہ کی نئی حکومت نے سعودی عرب کو 30کروڑ ڈالر مالیت کی میزائل ٹیکنالوجی اور بحرین کو 4ارب ڈالرمالیت کے ایف 16طیارے فروخت کرنے کا اعلان کیا ہے۔ واشنگٹن پوسٹ کی نئی رپورٹ کے مطابق ٹرمپ انتظامیہ نے سعودی عرب پر عائد پابندی اٹھاتے ہوئے اسے اسلحہ فروخت کرنے اور میزائل ٹیکنالوجی دینے کی منظوری دے دی ہے۔ رپورٹ کے مطابق سابق امریکی صدر باراک اوبامہ نے اپنے اقتدار کے آخری مہینے میں سعودی عرب کو ہتھیاروں کی فروخت پر پابندی عائد کی تھی جس کی وجہ یمن میں سعودی اتحاد کی بمباری سے مبینہ طور پر عام شہریوں کی ہلاکتوں پر آنے والا عالمی ردعمل تھا۔ امریکہ نے سعودی عرب کو اسلحے کی فراہمی تو روک دی تھی تاہم امریکی افواج نے یمن کی جنگ میں سعودی اتحاد کی لاجسٹک اینڈ سرویلنس سپورٹ جاری رکھی تھی۔ یمنی مانیٹرنگ گروپ کی حالیہ رپورٹ میں دعوٰی کیا گیا ہے کہ مارچ 2015ءسے اب تک یمن جنگ میں 11ہزار 400عام شہری ہلاک ہو چکے ہیں۔
واشنگٹن پوسٹ کے مطابق سعودی عرب کو اسلحے کی دوبارہ فراہمی کی منظور ی امریکی وزیرخارجہ ریکس ٹیلرسن نے دی ہے۔ حکومتی عہدیداروں کا کہنا ہے کہ سعودی عرب کو اسلحے کی فراہمی کی بحالی خطے میں امریکی اثر بحال کرنے کے لیے ضروری تھی۔کیونکہ سعودی عرب خطے میں امریکہ کا اہم اتحادی ملک ہے۔