یمن میں سعودی عرب کی جارحیت جاری، 115 سے زائد شہری شہید

مہر خبررساں ایجنسی نے عرب ذرائع کے حوالے سے نقل کیا ہے کہ سعودی اتحاد کے جنگی طیاروں اور اپاچی ہیلی کاپٹروں نے بحیرہ احمر میں یمن کے دو جزیروں عقبان اور کدمان پر شدید بمباری کی ہے جس کی وجہ سے ایک سو پندرہ عام شہری شہید اور درجنوں زخمی ہوئے ہیں۔ سعودی اتحاد کے جنگی طیاروں نے عام شہریوں کو نشانہ بنانے کے بعد طبی امداد کے ان دستوں پر بھی بمباری کردی جو زخمیوں کو بچانے کی کوشش کررہے تھے ۔ یمن کے المسیرہ ٹی وی کے مطابق صوبہ حدید کے مذکورہ دونوں جزیروں پر سعودی اتحاد کےجنگی طیاروں اور اپاچی ہیلی کاپٹروں نے پچیس بار بمباری کی ہے۔ المیادین ٹی وی نے بتایا ہے کہ سعودی اتحاد کے بمبار طیاروں نے سنیچر کو دارالحکومت صنعا کےعلاقے بنی حشیش پر بھی بمباری کی ہے۔ اس بمباری میں کم سے کم تین عام شہریوں کے شہید ہونے کی اطلاع ہے۔ سعودی جنگی طیاروں نے اسی طرح صوبہ حجہ کے قصبے حیران کے ایک بازار پر بمباری کردی جس میں درجنوں عام شہریوں کے شہید اور زخمی ہونے کی خبر ہے۔اس حملے میں کئی تجارتی مراکز تباہ ہوگئے ۔ سعودی جنگی طیارے اس سے پہلے حرض، میدی ، مزرق، مثلث اور خمیس کے بازاروں پر بھی بمباری کرچکے ہیں۔