امریکہ اور برطانیہ کا محمد بن سلمان کو ولیعہدی سے برطرف کرنے پر اتفاق

مہر خبررساں ایجنسی نے البناء اخبار کے حوالے سے نقل کیا ہے کہ امریکہ اور برطانیہ نے سعودی عرب کے خونخوار ولیعہد محمد بن سلمان کو ولیعہدی سے ہٹانے اور اس کی جگہ شہزادہ احمد بن عبدالعزیز کو ولیعہد بنانے پر اتفاق کرلیا ہے۔ اخبار البنا نے یورپی اعلی حکام کے حوالے سے نقل کیا ہے کہ سعودی عرب کے ولیعہد محمد بن سلمان عنقریب ڈوبنے والے ہیں اور خاشقجی کے خون میں سعودی عرب کے غرق ہونے کا بھی امکان ہے ۔  یورپی اعلی اہلکار نے فاش کیا ہے کہ محمد بن سلمان کو تمام سیاسی، سکیورٹی اور فوجی عہدوں سے ہٹا کر جبری طور پر نظر بند کیا جائےگا۔ شہزادہ احمد بن عبدالعزیز کو سعودی عرب کا وزير دفاع اور ولیعہد بنایا جائےگا اور محمد بن نائف کو نائب ولیعہد مقرر کیا جائےگا۔اس علاوہ دیگر اہم امور بھی سعودی عرب میں انجام پذیر ہوں گے جن میں اٹارنی جنرل سعود المعجب کی برطرفی بھی شامل ہے۔