مجھے اپنی عزت کا خیال ہے نواز شریف کو نہیں

مہر خبررساں ایجنسی نے پاکستانی ذرائع کے حوالے سے نقل کیا ہے کہ پاکستان کے سابق وزیرداخلہ چوہدری نثار نے کہا ہے کہ میں  سابق وزير اعظم  نواز شریف سے اب بھی الجھنا نہیں چاہتا کیوں کہ ان کو اپنی عزت کا پاس نہیں لیکن مجھے اپنی عزت کا خیال ہے۔ سابق وزیرِ داخلہ چوہدری نثار نے سابق وزیراعظم نوازشریف کے بیان پر رد عمل ظاہر کرتے ہوئے  کہا  کہ عبرت کا نشان وہ لوگ بنیں گے جنہوں نے اپنی غلطیاں چھپانے کے لیے قوم کے سامنے جھوٹ کے پہاڑ کھڑے کیے اور حد تو یہ ہے کہ انہوں نے اس عمل میں اپنے مرحوم، نیک اور پرہیزگار والد کو بھی بلا جواز بدنام کردیا۔ چوہدری نثار کا کہنا تھا کہ میں نواز شریف سے اب بھی الجھنا نہیں چاہتا، اگر ان کو اپنی عزت کا پاس نہیں تو مجھے تو اپنی عزت کا خیال ہے لیکن اب یکطرفہ تنقید مزید برداشت نہیں کی جا سکتی، یہ نہیں ہو سکتا کہ نواز شریف خود یا اپنے پیادوں کے ذریعے دوسروں پر الزامات لگائیں اور خود اپنے آپ کو قوم کے سامنے دودھ سے دھلا ظاہر کریں۔ واضح رہے نوازشریف نے گزشتہ روز لندن میں میڈیا سے بات کرتے ہوئے کہا تھا کہ جیپوں والوں سمیت عوام کا راستہ روکنے والے عبرت کا نشان بننے والے ہیں۔ چوہدرینثار کا انتخاباتی نشان جیپ ہے۔