صدر حسن روحانی سے پاکستانی فوج کے سربراہ جنرل قمر جاوید باجوہ کی ملاقات

مہر خبررساں ایجنسی کے نامہ نگار کی رپورٹ کے مطابق اسلامی جمہوریہ ایران کے صدر حسن روحانی سے پاکستانی فوج کے سربراہ جنرل قمر جاوید باجوہ نے دو طرفہ تعلقات  باہمی امور کے بارے میں ملاقات اور گفتگو کی۔ صدر حسن روحانی نے اس ملاقات میں پاکستان کی امن و سلامتی کو ایران کی امن و سلامتی قراردیتے ہوئے کہا کہ ایران دہشت گردی کے خلاف پاکستان کی ہر ممکن مدد کرنے کے لئے تیار ہے۔ انھوں نے کہا کہ دہشت گردی ایک عالمی خطرہ ہے اور اس کا خاتمہ باہمی اتحاد اور تعاون کے ذریعہ ہی ممکن ہے۔ انھوں نے کہا کہ بعض غیر علاقائی طاقتیں خطے کے امن و ثبات کو درہم و برہم کرنا چاہتی ہیں اور دونوں برادر اور اسلامی ممالک کو دمشنوں کے شوم منصوبوں سے آگاہ اور باخبر رہنا چاہیے اس ملاقات میں جنرل باجوہ نے ایران کو پاکستان کا دوست ، برادر اور ہمسایہ ملک قراردیتے ہوئے کہا کہ پاکستان ایران کے ساتھ دفاعی شعبہ میں تعلقات کو فروغ دینے کا خواہاں ہے جنرل باجوہ نے پاکستان میں دہشت گردی کے خلاف پاکستانی فوج کے آپریشن اور قربانیوں کا ذکر کرتے ہوئے کہا کہ پاکستان نے دہشت گردی کے خلاف جنگ میں بڑی قربانی پیش کی ہے۔