کوالالمپور میں اسکول میں آگ لگنے سے 25افراد جاں بحق

مہر خبررساں ایجنسی نے اسپوٹنک کے حوالے سے نقل کیا ہے کہ ملائشیا کے دارالحکومت کوالالمپور میں اسکول میں آگ لگنے سے طلبا سمیت 25افراد جاں بحق ہوگئے ہیں۔ ذرائع کے مطابق آگ صبح سویرے دینی درس گاہ دارالقرآن اتفاقیہ میں لگی۔ ملائشین حکام کے مطابق مرنے والوں میں 23 طلباء اور 2 وارڈن شامل ہیں ۔ریسکیو عملے کے مطابق آگ لگنے کا واقعہ مقامی وقت کے مطابق صبح 5بجکر 15 منٹ پر پیش آیا، جس کے بعد ریسکیو کا آپریشن شروع کیا گیا اور عمارت سے زخمیوں کو لاشوں کو باہر نکالا گیا۔ ریسکیو ذرائع کا کہنا ہے کہ  واقعہ میں زیادہ تر ہلاکتیں دم گھٹنے کی وجہ سے ہوئی ہیں۔