قطر نے 80 ممالک کے لئے مفت ویزا اسکیم متعارف کرا دی

مہر خبررساں ایجنسی نے الجزیرہ کے حوالے سے نقل کیا ہے کہ قطر نے سعودی عرب اور اس کے تین اتحادی عرب ممالک کی قطر کے خلاف معاندانہ پالیسیوں کو ناکام بنانے کے لئے 80 ممالک کے لئے مفت ویزا اسکیم متعارف کرا دی، جس کا اطلاق فوری طور پر ہوگا۔ قطر کی جانب سے متعارف کرائی جانے والی فری ویزا اسکیم کے تحت یورپی یونین، مغربی ممالک، لاطینی امریکہ اور ایشیائی ممالک پر مشتمل 80 ممالک کے شہریوں کو مفت ویزا دستیاب ہوگا۔حکام کے مطابق ویزا اسکیم میں شامل ممالک کے شہریوں کو صرف اپنا مستند پاسپورٹ دکھانا ہوگا، جس کے بعد انہیں ملک میں داخلے کی اجازت ہوگی، ویزا فری اسکیم قطر کو خطے کا آزاد ترین ملک بنادے گی۔فری ویزا حاصل کرنے والے نمایاں ممالک میں امریکا، برطانیہ، کینیڈا، بھارت، جنوبی افریقا، آسٹریلیا، نیوزی لینڈ اور مشرقی افریقی ملک شامل ہیں،پہلے سے ویزا فری 6 خلیجی ممالک کے علاوہ لبنان واحد عرب ملک ہے، جسے اسکیم میں شامل کیا گیا ہے۔مفت ویزا حاصل کرنے والے افراد کو ان کے ملک کی کیٹیگری کے حساب سے قطر میں قیام کی اجازت ہوگی، کم سے کم قیام کی مدت 30 روز اور زیادہ سے زیادہ 180 دن ہیں جبکہ شہریوں کے لئے 90 روز کا ویزا بھی ہے۔قطر ٹورازم اتھارٹی کے قائمقام چیئرمین حسن الابراہیم کا کہنا ہے کہ فری ویزا اسکیم کے ذریعے لوگوں کو قطر کی جانب سے مہمان نوازی کا موقع ملے گا اور یہاں آکر غیر ملکیوں کو ثقافتی ورثے اور قدرتی خزانے کو دریافت کرنے کا موقع ملے گا۔واضح رہے کہ  سعودی عرب، بحرین، مصر اور متحدہ عرب امارات نے قطر پر دہشت گردی کی حمایت کا الزام عائد کرتے ہوئے اس کے خلاف زمینی ، ہوائی اور دریائي راستے بند کردیئے ۔ لیکن ایران اور ترکی نے بڑھ کر قطر کی مدد کی جس کے بعد سعودی عرب اور اس کے تین اتحادی عرب ممالک کی قطر کے خۂاف پابندیاں ناکام ہوگئی ہیں۔ قطر نے سعودی عرب کے 13 مطالبات کو بھی ٹھکرا دیا ہے۔