پاکستان میں بچوں کے جھگڑے پر بھائیوں میں تصادم میں 5 افراد ہلاک

مہر خبررساں ایجنسی نےایکسپریس نیوز کےحوالے سے نقل کیا ہے کہ  پاکستان کے علاقہ پبی میں بچوں کے جھگڑے پر دو بھائیوں میں مسلح تصادم کے نتیجے میں خاتون سمیت ایک ہی خاندان کے 5 افراد ہلاک ہوگئے ہیں۔اطلاعات کے مطابق پبی کے علاقے چوکی درب میں رام داد اور سردار علی کے بچوں کے درمیان ہونے والے معمولی جھگڑے پر بڑوں میں تکرار ہو گئی اور پھر دونوں بھائیوں نے ایک دوسرے پر خود کار اسلحے سے فائرنگ کر دی جس کے نتیجے میں رام داد، سردار علی، اس کی اہلیہ اور ایک بیٹا زبیر موقع پر ہی ہلاک  ہو گیا جب کہ دوسرے بیٹے عمیر کو شدید زخمی حالت میں ڈسٹرکٹ ہیڈ کوارٹر اسپتال پبی منتقل کیا گیا تاہم وہ بھی زخموں کی تاب نہ لاتے ہوئے دم توڑ گیا۔ پولیس نے رام داد کی اہلیہ اور سردار علی کے بیٹے کی مدعیت میں مقدمہ درج کر کے تحقیقات کا آغاز کردیا ہے۔