بیت المقدس میں یہودیوں کیلئے 900 نئے گھرتعمیر کرنے کا اعلان

مہر خبررساں ایجنسی نے عرب ذرائع کے حوالے سے نقل کیا ہے کہ اسرائیلی حکومت نے مقبوضہ بیت المقدس میں قائم یہودی کالونی میں مزید 900 مکان تعمیر کرنے کا اعلان کیا ہے۔ صہیونی حکومت کی طرف سے یہ اعلان ایک ایسے وقت میں کیا گیا ہے جب اسرائیلی وزیراعظم بینجمن نیتن یاہو امریکہ کے دورے پرہیں۔ ایک ہزار کے قریب مکانات کی تعمیر کا یہ اعلان امریکہ کیلئے بھی اسرائیل کی طرف سے واضح پیغام ہے۔ مرکزاطلاعات فلسطین کے مطابق گیلو کالونی میں نوسو مکانات کی تعمیر کا فیصلہ پہلے کیا گیا تھامگر اس پر مزید بحث کے لیے اسے موخر کردیا گیا تھا۔ اطلاعات کے مطابق بیت المقدس میں اسرائیلی بلدیہ کے زیرانتظام پلاننگ و ہائوسنگ کمیٹی نے جنوب مغربی بیت المقدس میں نو سو مکانات کی تعمیرشروع کرنے کے لیے تمام انتظامات مکمل کرلیے ہیں۔ بلدیہ کی جانب سے حتمی منظوری کے بعد گھروں کی تعمیر کے لیے اراضی کی نشاندہی کی جائے گی جس کے بعد وہاں پرتعمیراتی کام شروع کیا جائے گا۔