ہندوستان میں طوفانی بارش کی وجہ سے 92 افراد ہلاک

مہر خبررساں ایجنسی نے ہندوستانی ذرائع کے حوالے سے نقل کیا ہے کہ ہندوستانی ریاستوں راجستھان اور اترپردیش میں گردوبار کے طوفان اور تیز بارشوں سے 92  افراد ہلاک ہوگئے ہیں جب کہ 100 سے زائد زخمی ہیں۔ اطلاعات کے مطابق اترپردیش کے شہر آگرہ اور راجستھان کے تین اضلاع الور، بھرت پور اور دھول پور میں طوفانی بارشوں اور 130 کلومیٹر فی گھنٹہ کی رفتار سے چلنے والی ہواؤں نے بڑے پیمانے پر تباہی مچادی۔ طوفان سے اترپردیش میں 46 اور راجستھان میں 33 افراد جبکہ دیگر علاقوں میں 11 سے زائد افراد ہلاک ہو گئے۔ درخت اور ہورڈنگز گرنے، کچے مکانات منہدم ہونے اور آسمانی بجلی گرنے سے ہلاکتوں میں اضافہ ہوا۔ پی ٹی آئی  کے مطابق 92 افراد کی ہلاکتوں کے علاوہ 100 سے زائد افراد زخمی ہیں جس کی وجہ سے ہلاکتوں میں اضافے کا خدشہ ظاہر کیا جا رہا ہے۔