امریکہ کا شام پر 105 میزائلوں سے حملہ کرنے کا اعتراف

مہر خبررساں ایجنسی نے ایسوسی ایٹڈ پریس کے حوالے سے نقل کیا ہے کہ امریکی وزارت دفاع پینٹاگون نے اعتراف کرتے ہوئے کہا ہے کہ  امریکہ نے شام پر 105 میزائلوں سے حملہ کیا۔ جبکہ روس کا کہنا ہے کہ شام کے ایئر ڈیفنس سسٹم نے 71 میزائل حملوں کو فضا میں ناکارہ بنا دیا ۔ امریکی محکمہ دفاع پینٹاگون نے شام کے حوالے سے بریفنگ میں بتایا کہ شام پر حملے کامیاب رہے۔ ڈائریکٹر جوائنٹ چیفس آف اسٹاف لیفٹیننٹ جنرل کینتھ میکنزی نے بتایا کہ شام پر کل ایک سو پانچ میزائل داغے گئے اور تمام اہداف کو کامیابی سے نشانہ بنایا گیا۔  جبکہ روس اور شام کا کہنا ہے کہ امریکہ کے 71 میزائل حملوں کو نکارہ بنادیا گیا اور امریکہ شام میں اپنے اہداف تک پہنچنے ناکام رہا ہے۔ روس کا کہنا ہے کہ امیرکہ اور اس کے اتحادی عالمی سطح پر بدامنی اور بد نظمی پھیلا رہے ہیں اور بین الاقوامی قوانین کی صریح خلاف ورزی کا ارتکاب کررہے ہیں۔