اسرائیلی وزیر اعظم کا اقتدار خطرے میں پڑگیا

مہر خبررساں ایجنسی نے غیر ملکی ذرائع کے حوالے سے نقل کیا ہے کہ اسرائیلی وزیر اعظم نیتن یاہوکو کرپشن الزامات کا سامنا ہے اور اس کا ساتھی وعدہ معاف گواہ بن گیا ہے جس کے بعد اسرائیلی وزیراعظم کا اقتدار خطرے میں پڑگیا ہے۔اطلاعات کے مطابق نیتن یاہو کے سابق چیف آف اسٹاف اری ہارو وعدہ معاف گواہ بننے کیلئے تیار ہوگئے ہیں ، قانونی ماہرین کے مطابق اری ہارو کی شہادت بہت اہم ہے اور نیتن یاہو کو اپنے منصب سے بھی ہاتھ دھونا پڑ سکتا ہے۔اسرائیلی عدالت نے اشارہ دیا تھا کہ وزیراعظم نیتن یاہو کو تفتیش کے نتیجے میں کرپشن الزامات کا سامنا کرنا پڑ سکتا ہے،نیتن یاہو کو رشوت، فراڈ اور اعتماد کے منافی اقدامات کے تحت جاری فوجداری تفتیش کا سامنا ہے۔عدالت نے کرپشن الزامات عائد کرنے کا عندیہ ایک عدالتی کارروائی کے دوران دیا، عدالتی مجسٹریٹ نے کارروائی کے مندرجات میڈیا پر رپورٹ یا شائع کرنے کی ممانعت کر دی ہے۔حکومتی استغاثہ اس وقت اری ہارو سے پوچھ گچھ جاری رکھے ہوئے ہے، اس نے کرپشن الزامات کے بعد اپنے عہدے سے استعفیٰ دے دیا تھا۔