لندن کی 24 منزلہ عمارت میں ہولناک آگ لگ گئی

مہر خبررساں ایجنسی نے رائٹرز کے حوالے سے نقل کیا ہے کہ مغربی لندن کی 24 منزلہ عمارت میں ہولناک آگ لگ گئی، فائر بریگیڈ کی 40 گاڑیاں اور200 سے زائد فائر فائٹرز آگ پر قابو پانے میں مصروف ہیں۔ اطلاعات  کے مطابق آگ گرینفل ٹاور میں مقامی وقت کے مطابق رات ایک بج کر 16 منٹ پر لگی ۔یہ بلڈنگ 120 فیلٹس پر مشتمل ہے جس کی دوسری منزل پر لگنےوالی آگ نے پوری عمارت کو لپیٹ میں لے لیا ہے۔ عینی شاہدین کے مطابق عمارت کی بالائی منزلوں پر لوگ موجود ہیں جو مدد کے لیےفلیش لائٹس سے اشارے بھی کر رہے ہیں۔ذرائع کے مطابق تاحال آگ لگنے کی وجہ معلوم نہیں ہوسکی ہے ۔ پولیس نے علاقے کو گھیرے میں لے لیا ہے اور علاقے سے لوگوں کا انخلا جاری ہے۔ لندن فائر بریگیڈ کا کہنا ہے کہ فائر بریگیڈ کی 40 گاڑیاں اور200 سے زائد فائر فائٹرز آگ پر قابو پانے میں مصروف ہیں اور تمام وسائل بروئے کار لائے جارہے ہیں۔