فرانس میں صدارتی انتخابات کے دوسرے مرحلے میں ووٹنگ کا آغاز

 مہر خبررساں ایجنسی نے اسکائی نیوز کے حوالے سے نقل کیا ہے کہ فرانس میں صدارتی انتخابات کے دوسرے مرحلے میں  ووٹنگ کا آغاز ہوگیا ہے۔فرانس کے دوسرے مرحلے کے انتخابات  میں دو امیدواروں مارین لی پین اورمیکرون کے درمیان کانٹے کا مقابلہ ہے۔اطلاعات کے مطابق فرانس میں صدارتی انتخابات کے دوسرے مرحلے کیلئے پولنگ آج ہو رہی ہے جس میں فرانسیسی شہری اپنے صدر کا انتخاب کریں گے۔ قوم پرست خاتون سیاست دان مارین لی پین اور آزاد امیدوار ایمنوئیل میکرون کے درمیان سخت مقابلے کی توقع ظاہر کی جا رہی ہے۔ تازہ پولز کے مطابق 49 سالہ مارین لی پین کی عوامی مقبولیت میں کمی آئی ہے جس کی وجہ سے انتخابات میں ان کی جیت کے 38 فیصد امکانات ہیں جب کہ 39 سالہ ایمنوئیل میکرون کی کامیابی کے امکانات 62 فیصد بتائے جارہے ہیں۔ انتخابی مہم کے آخری ہفتے کے دوران دونوں امیدواروں نے ایک دوسرے کے خلاف خوب الزامات لگائے۔ میکرون نے گزشتہ روز اپنی انتخابی مہم ہائی جیک ہونے کا دعویٰ بھی کیا تھا۔ دوسری جانب فرانس میں سکیورٹی ہائی الرٹ ہے اور عوامی مقامات سمیت اہم عمارتوں پر سکیورٹی اہلکاروں کی بھاری نفری تعینات ہے۔ ذرائع کے مطابق دنیا کے دیگر ممالک میں مقیم فرانسیسی شہریوں نے ایک روز قبل ہی ووٹ ڈال دئیے تھے، وہاں ووٹوں کی گنتی کا عمل جاری ہے۔