پنٹاگون نے انتظامی اخراجات کی مد 125 ارب ڈالر ضائع کیے

مہر خبررساں ایجنسی نے رائٹرز کے حوالے سے نقل کیا ہے کہ ایک رپورٹ کے مطابق محکمہ دفاع پنٹاگون نے انتظامی اخراجات کی مد 125 ارب ڈالر ضائع کیے ہیں تاہم کانگریس کے خوف کے باعث رپورٹ کو دبادیا گیا ہے۔ امریکی اخبار واشنگٹن ٹائمز کی ایک رپورٹ میں انکشاف کیا گیا ہے کہ گزشتہ سال پنٹاگون کو ایک رپورٹ ارسال کی گئی تھی جس میں آئندہ پانچ برسوں کے دوران 125 ارب ڈالرز بچت کرنے کے لیے مختلف تجاویز دی گئی تھیں ، جن میں بیورو کریسی کو منظم کرنے ، جلد ریٹائرمنٹ کا آغاز، انفارمیشن ٹیکنالوجی کا بہتر استعمال اور مہنگے کنٹریکٹرز سے نجات حاصل کرنے کی تجاویز شامل تھیں۔ رپورٹ کے مطابق پنٹاگون اس وقت سالانہ تقریبا چھ سو ارب ڈالر دفاعی اخراجات کی مد میں خرچ کرتا ہے۔ اس میں رقم کا ایک بڑا حصہ ہیومن ریسورس، لاجسٹک اخراجات اور دنیا بھر میں امریکی فوجیوں کو سہولیات فراہم کرنے پر خرچ کی جاتی ہے، تاہم انتظامی امور پر بہت زیادہ اخراجات آتے ہیں۔ پنٹاگون بیوروکریسی نے رپورٹ پر عمل کرنے کے بجائے اسے دبانے کو ترجیح دی ہے کیونکہ دفاعی بیورو کریسی کو خدشہ تھا کہ کہیں کانگریس اس رپورٹ کی بنیاد پر دفاعی اخراجات کے بل میں ہی کٹوتی نہ کردے ۔