ہندوستان کے میزائل تجربات پاکستان کی سلامتی کے لئے خطرہ

مہر خبررساں ایجنسی نے پاکستانی ذرائع کے حوالے سے نقل کیا ہے کہ پاکستان کے مشیر خارجہ سرتاج عزیز نے کہا ہے کہ ہندوستان کیط رف سے میزائل تجربات پاکستان کی سلامتی کے لئے واضح خطرہ اور ہندوستان کی غیر ذمہ داری کا منہ بولتا ثبوت ہیں۔ چیرمین رضا ربانی کی زیرصدارت سینیٹ کا اجلاس ہوا جس میں اظہار خیال کرتے ہوئے مشیر خارجہ سرتاج عزیز نے کہا  کہ ہندوستان بحر ہند کے علاقے میں ایٹمی ہتھیاروں کی دوڑ شروع کررہا ہے اور اس نے نیو کلیئر سب میرین کا بھی تجربہ کیا جب کہ حالیہ  ہندوستانی میزائل تجربات پاکستان کی سلامتی کےلئے واضح خطرہ ہیں۔ مشیر خارجہ کا کہنا تھا کہ ایسے تجربات  ہندوستان کی غیر ذمہ داری کا منہ بولتا ثبوت ہیں، پاکستان کو ان تجربات پر ناصرف تشویش ہے بلکہ اس سے خطے میں طاقت کا توازن بھی بگڑ رہا ہے۔ سرتاج عزیز کا کہنا تھا کہ پاکستان اپنی سرحدوں کی حفاظت سے بخوبی واقف ہے اور اپنی دفاعی ضروریات سے بھی مکمل طور پر آگاہ ہے، پاکستان ہتھیاروں کی دوڑ میں شامل ہوئے بغیر اپنی دفاعی صلاحیت میں اضافہ کرتا رہے گا۔ ان کا کہنا تھاکہ ہم نے بھارت کو ایٹمی ہتھیاروں کے حوالے سے مذاکرات کی دعوت دی لیکن بھارت نے پاکستان کی دعوت کا مثبت جواب نہیں دیا، اب رواں سال ستمبر میں اقوام متحدہ کی جنرل اسمبلی میں ایک قرار داد پیش کریں گے جس میں بحرہ ہند کو ایٹمی ہتھیاروں سے پاک قرار دینے کا مطالبہ بھی پیش کیا جائےگا۔