بھارت میں کورونا وائرس سے 100 صحافی ہلاک ہوگئے

مہر خبررساں ایجنسی نے بھارتی ذرائع کے حوالے سے نقل کیا ہے کہ بھارت میں کورونا وائرس کی دوسری لہر فرنٹ لائن پر کام کرتے صحافیوں کے لیے بھی مہلک ثابت ہونے لگی۔ بھارت میں کورونا وائرس سے اب تک 100 صحافی ہلاک ہوگئے ہیں۔ بھارت میں کورونا وائرس سے یومیہ دو صحافیوں کی اموات رپورٹ ہورہی ہے۔ گذشتہ ایک ماہ کے دوران پچاس سے زیادہ صحافی کورونا کے باعث ہلاک ہوگئے۔

نئی دہلی میں کی گئی تحقیق کے اعداد و شمار کے مطابق کورونا وائرس سے بھارت میں ایک سال کے دوران ایک سو سے زائد صحافی ہلاک ہوچکے ہیں۔

کورونا وائرس سے صحافیوں کی اموات سب سے زیادہ ریاست اتر پردیش اور  تلنگانہ میں ہوئی ہیں۔

میڈیا حقوق پر کام کرنے والی جنیوا کی غیر سرکاری تنظیم کے مطابق بھارت کورونا سے صحافیوں کی اموات کے لحاظ سے تیسرے نمبر پر آگیا ہے۔ کورونا وائرس سے صحافیوں کی سب سے زیادہ 181 اموات برازیل اور 140 اموات پیرو میں ہوئی ہیں۔